PAKISTANI MEDIA K WAZAAIF KA TANQEEDI JAIZA

                  Mojooda dor me media tafrih o maloomat ki farahmi ka ahem zariya hai. Media films, songs, dramon , cartoons , khabron or sports k zariye tafrih-o-maloomat faraham kerta hai. Media k function ko is trah biyaan kertay hain. 

                   Education + Entertainment = Edutainment

                   

                   Information + Entertainment = Infotainment

Jis trah waqt guzarnay k sath sath dusray shobon me tabdiliyan ronuma ho rahi hain bilkul isi trah is shobay me bhi tabdiliyan ronuma ho rahi hain lekin ye tabdiliyan misbat hain ya manfi is per bat hogi.

1) FILMS:

Aaj k dor men filmo men fahashi barhti ja rahi hai. Kuch filmo ko to ban bhi kia gaya hai jaisay phantom, dishoom , haider or agent vinod waghyra. Kuch mah qabal pakistani fim maalik ko bhi ban kia gya tha lekin baad men ye ban utha lia gaya. Filmon men actresses k costumes mukhtasir se mukhtasir hotay ja rahay hain. Hamari filmon men aise bohot se scenes atay hain jin per sensor lagana chie. Filmon ka mayar girta ja raha hai ab fahashi-o-uryaniyat ko hi mayar bana dia gaya hai. Ab pakistani fimon ne acha come back kia hai Pakistan films bollywood films se qadray behtar hain. Ab umeed ki ja rahi hai k pakistani film industry taraqi ki manazil tezi se tay karay gi. Pakistani fimon men wrong number, jawani phir nahi aani , bin roye , na maloom afraad or janaan bohot mashoor hui hain. Ab filmon ki promotion k liye film ki cast mukhtalif tv shows men aati hai jaisay morning shows or reality show jeeto pakistan men. In shows men film k director ya producer film ka over view detay hain takay awaam men dilchaaspi paida ho or wo fim dekhnay cinema jaen.  Cinema men film ki promotion k liye baaz oqaat film ki cast bhi mojood hoti hai or log un k sath selfies letay hain.Ye kafi entertaining hota hai. 

2) CARTOONS:

Ab 3d cartoons a gay hain jaisay alpha and omega, The smurfs 2 or delhi safari waghyra. In ko 3 dimension cartoon kaha jata hai. Ye tasavur 1915 se mojood tha lekin ye 2000s men ziada kamiyaab hua. Is ki ahem misaal AVATAR hai jo december 2009 or january 2010 men paish kia gaya. Cartoons edutainment provide kertay hain yani aisay cartoons jin men bachon ko tafreeh k sath taleem bhi faraham ki jaye. Is ki ahem misaal Little Einsteins, Sid the science kid , curious George or Dora The Explorer hain.

                Ab cartoons men bhi bht ziada vulgarity a gai hai. Cartoons men bhi wese hi costumes istemaal ho rahay hain jaisay hollywod movies men hotay hain.Is se bachon ka zahen kharab ho sakta hai lahaaza is per sensor laganay ki zaroorat hai.

3)  SONGS:

Songs tafrih ka ahem sabab hain phir chahay wo audio hon ya video.  Ab smart phone ka dor hai to aap kabhi bhi songs sun saktay hain. Agar safar k doraan songs sunay jaen to safar acha guzarta hai. Songs sun'nay k liye smart phones, tab , mp3 ,mp4 or ipod use kiye jatay hain kyun k ye portable devices hain. Pehle zamanay men songs sun'nay k liye radio or gramophone istemaal hotay thay . Us waqt science ne itni taraqi nahi ki thi or  logon k pas itni facilities  nahi thi. Music k baray men kaha jata hai k:
                      " Moseeqi rooh ki ghiza hai"  OR     " Music is food for the soul"
Music ki kuch types hoti hain.
1) Folk music
2) Pop music
3) Classical music

              Aaj kal songs men bht kharab zaban or alfaaz istemaal ho rahay hain. Lyris bohot hi zaida behuda hotay hain. Agar video ki bat karen to wo to dekhnay k qaabil hi ni hoti, Pehle songs men tameez k dairey men rehtay huay tameez ki zaban istemaal ki jati thi or videos bhi itni behuda nahi hoti theen. Ab songs muhazib gharano men sath beth ker nahi sun saktay.

4) DRAMAS:

Aaj kal Paakistani dramon ki bari dhoom hai. Ab Pakistani dramay India men bhi dekhay ja rahay hain jin men Bashar momin or Humsafar qaabil-e-zikr hain. 19s men bhi Pakistani dramay bohot mayari hua kertay thay lekin jab 2000 men cable a gaya to log us se fascinate huay. Us waqt aik bari abaadi star plus dekhnay lagi jis men back to back dramay atay thay lekin ab phir Pakistani dramon ne apna khoya hua muqaam haasil ker lia hai. Ab digest k novels ko dramon ki shakal men paish kia ja raha hai. Is tarah digest writer ko bhi shohrat haasil hoti hai. Dramay ki promotion k liye drama start honay se pehle dramay ki cast morning shows men shirkat kerti hai. 

        Jab Pakistani media ko star plus ki fahashi dikhanay se sukoon mila to turkey k behuda dramay dikhanay shuru ker diye. Kuch Pakistani cannels per bhi gher mulki dramay dikhaye jatay hain jin men urdu 1, A plus . Geo kahani or Filmazia shamil hain. Naye or puraanay dramon men ye farq paaya jata hai.

1 ) JOINT FAMILY SYSTEM: 

           Pehle dramon men sab log qareebi rishtedaar aik ghar men mil jul ker rehtay thay , logon men mohobbat thi or un men wabastgi paai jati thi. Ab log alag alag gharon men rehtay hain , baray baray banglay dikhaye jatay hain lekin log aik dusray se bezaar hain or aik dusray k khilaaf saazishon men lagay rehtay hain. 

2) BE HAYAAI: 

               Pakistani dramon men sensor ki ashad zaroorat hai kyun k be hayaai had se barhti ja rahi hai. actresses k libaas simat rahay hain or bareek hotay ja rahay hain. Is k ilawa dupattay ka tasavur to khatam hi hota ja raha hai. Ab dramon men pregnancy or rape jaisay alfaaz ka tawatar se istemaal ho raha hai. 

3)  SAQAAFATI  DRAMAY:

                     Pehle k dramon men Pakistan k tamaam soobon ki saqafat ko dikhatay thay. Is trah aik soobay k logon ko dusray soobon ki saqafat se waqfiyat haasil hoti thi or apnay mulk ki tehzeeb-o-saqafat se lagao paida hota tha. Is ki ahem misaal drama marvi or jungle hain. Lekin ab dramay ishq-o-mohobbat  k daiyre tak mehdood ho gay hain.

4) HIRS-O-TAMA:

                 Dramay ma'ashray ki abaadi k status ko dekh ker bananay chahiyen. Hamary mulk ki  beshter abaadi ghurbat ka  shikaar hai lekin hamray dramon men is bat ko yaksar nazar andaaz ker dia jata hai or aisay dramay dikhaye jata hain jin men log crores ki baten kertay hain or aalishan banglon or kothion men rehtay hain. Aisay dramay dekh ker logon men hirs paida hota hai wo aasaishaat k husool k liye jaraim (crimes) ki taraf raaghib hotay hain.

5)RISHTON MEN MOHOBBAT:

                     Pehle logon men mohobbat paai jaati thi , log aikdusray se waabasta thay or aik dusray ki qadar kerna jantay thay. Is liye us waqt k dramay bhi is baat ki akaasi kertay thay. Lekin ab khooni rishte aamnay samnay hain or rishton per se logon ka aitebaar uthta ja raha hai. Ab dramon men behen ko behen ka dushman dikha rahay hain.

5) NEWS:

           Pakistan me mojooda dor men news channels ki bharmaar hai. Ab khabron men serious issue ko bhi non serious bana dia jata hai jaisay political leaders per filmi ganay laga diye  jatay hain or news casters cheekh cheekh ker khabren sunatay hain or is trah zra si baat ko ahem khabar bana detay hain. Is trah ma'ashray men sansani paida hoti hai or log ghabra jatay hain. Is k ilawa khabron men jo zabaan  istemaal ho rahi hai wo shurfa ki zabaan se mail nai khaati jaisay company malkaan ne arbon rupay harap liye or shaheeno ne bengal tigers ko dhool  chata di etc yani khabron men shiddat pasandi ka izhaar hota hai. Khabarnamay men khabron k darmiyan music ka partition hota hai jis se khabron ki sanjeedgi muta'asir hoti hai. 

                                                                 

                                      BENISH PERVEZ  (MA PREVIOUS)

PAKISTAN KI SAQAFATEIN

SINDH KI SAQAFAT

MAHAJIRON KI SAQAFAT :-

Mahajir taleem yafta , muhazib aur ba akhlaq log hotay hain . In ka libaas sadah aur deeda zeb hota hai , mard amooman kurta pajama zeb-e-tan karte hain aur khawateen shalwar qameez aur sarhi pehana pasand karti hain . In ki zaban urdu hai . In k riwayati khanon mein nargisi kaftay , pulao , shami kabab waghaira mashoor hain .

BOHRI SAQAFAT :-

Bohri sulah pasand aur aman pasand log hotay hain jahan mard khaas sherwani pehnte hain aur makhsoos topi lagate hain jis per zari ka kaam hota hai aur khwateen khaas burqa pehnti hain jo mdo hison per mushtamil hota hai . Yeh log gujrati bolte hain aur karobari hotay hain .

SINDHI SAQAFAT :-

Dheema lehja aur meethi boli inki pehchan hai aur sab se qadeem saqafat honay ka aizaz bhi inhen hasil hai . In ka libaas bht hi riwayati aur mashoor hai jis mein mard topi aur ajrak ka istemal karte hain  aur khwateen sheeshay aur dhaagon se banay hue rangeen kaprhay pehana pasand karti hain . Yahan mauseeqi k saazon mein alghoza , harmonium aur iktara mashoor hain . In k riwayati khanay chawal ki roti , machli aur aabi parinday hain . Inka riwayati khel malakhrha hai .

THAR KI SAQAFAT :-

Thar k bashinday jo zaban boltay hain usko tharri kehte hain . Inka zariya-e-maash maweshi palna hai . Khwateen apne makhsoos libaas aur zewarat ki wajah se bht mashoor hain .Yahan per logon ki aksariat hindu hai .

PUNJAB KI SAQAFAT

SARAIKI SAQAFAT:-

Saraiki bolne walay charon soobon mein abad hain . Inki saqafat bht munfarid hai . Yeh log sada-loh aur mehman nawaz hotay hain aur zyada tar transport k shobay wabasta hotay hain . 

CHOLISTAN KI SAQAFAT:-

Cholistan ki saqafat mein sindh aur punjab dono ka rang paya jata hai . In k khanay sadah hotay hain aur inka pesha maweshi palna hai

PUNJABI SAQAFAT:-

Punjab k log bht mehnati , jafa-kash aurmehman nawaz hotay hain . Inki zaban punjabi hai jis k mukhtalif lab-o-lehjay pae jatay hain . Mard dhobi kurta , khwateen lacha aur kurta zeb-e-tan karti hain . Yahan k paranday apni misaal ap hain aur in k ilawah mard khussay aur khwateen munda pehna pasand karti hain . In k riwayati khanay saag , makai ki roti aur lassi hain . In k mashoor khel gadka aur kabbadi hain . In k mashoor raqs bhangrha , sammi aur luddi hain . In ki aksariyat zaraat k peshay se wabasta hai . Pak fauj k zyada tar jawanon aur afsaron ka talluq bhi isi soobay se hai .

KHYBER PUKHTUNKHWA KI SAQAFAT

SWAT KI SAQAFAT:-

Yahan k log khubsurat , sehat mand aur jafakash hotay hain . Yahan k log taleem yafta , aitidal pasand aur jidat pasand hotay hain .

KAILASH KI SAQAFAT:-

Yahan k logon ka talluq qadeem younan se hai isi waja se in ki zaban kailashi mein younan ka ansar paya jata hai . In k apne munfarid mazhabi aqaid hain .Inka zariya-e-muash sayahat aur kheti barhi hai . Inki khwateen ka makhsoos libaas hota hai . Yahan ki khwateen k baal banane ka tareeqa bhi bht mashoor hai .

PUKHTOONON KI SAQAFAT:-

 Pukhtoon bht hi jeedar , ghairat mand aur bahadur hotay hain . Yeh log bht hi khubsurat hotay hain . Inki zabaan pashto hai . In k riwayati khanon mein namkeen gosht , chapli kabab , sajji waghaira shamil hai . Khushk mewah jaat aur mukhtalif iqsam k phal yahan wafir miqdar mein pae jatay hain . Shalwar qameez , pagrhi aur waskit in ka makhsoos libaas hai  . Yahan ki riwayati peshawari chappal dunya bhar mein bht mashoor hai . Yahan ka makhsoos raqs khattak dance hai .

MANSEHRA KI SAQAFAT :-

Yahan k log bht mehnati aur jafakash hotay hain . Yahan ki boli janay wali zabaan hinko hai . In k khanay khyber Pukhtunkhwa k deegar khanon ki tarah hotay hain . 

GILGIT BALTISTAN KI SAQAFAT

Gilgit Baltistan ki apni munfarid saqafat hai . Yahan ki boli janay wali zabaan balti hai . In ka apna munfarid libaas hai jis mein par wali topi , waskit aur koti shamil hai . Inka apna makhsoos raqs bhi hai . In ka makhsoos khel polo aur chogan hai jo inka qaumi khel bhi hai .

KASHMIR KI SAQAFAT

Yeh aik dilkash saqafat hai . Yahan ki boli janay wali zabaan kashmiri hai . Yahan k apne makhsoos libaas hain jin mein shawl aur dhagay ki karhai k kaprhay shamil hain .Yahan k riwayati khanon mein kashmiri chai aur kasmiri pulao apni misaal aap hain .

BALOCHISTAN KI SAQAFAT

MAKRANI SAQAFAT:-

Yeh saqafat sindh aur balochistan ki sahili patti per aabad hai . Yahan k logon ko rajaon k dor mein ghulamon ki haisiat se america se laya gaya tha . Inka zariya-e-muash maahi geeri hai aur in ka apna makhsoos afreeqi raqs hai . 

BRAHWI SAQAFAT:-

Inki saqafat bht munfarid aur barhi nsaqafat hai . Inki saqafat balochi saqafat se bilkul mukhtalif . Yeh log drawrhi nasal se talluq rakhte hain . Inki zabaan bht qadeem hai aur in ki apni munfarid rasmein hain .

BALOCHI SAQAFAT:-

Yahan ki boli janay wali zabaan balochi hai . Yeh log bht sadah log hotay hain . In k han zyada tar qabaili culture ka rang maujood hai . In ki khwateen k makhsoos libaas hotay hain aur mardon ki makhsoos chappal hoti hai jissay chawat kehte hain .

BALOCHISTAN KI HAZARAH SAQAFAT:-

Hazarah qabeelay k log taleem yafta hotay hain aur zyada tar sarkari mulazmat se wabasta hotay hain . In ki zabaan darri hai . In logon ka taaluq changez khan ki nasal se hai , in k riwayati khanon mein mantoo, namkeen gosht aur khameeri roti bht mashoor hai .

BALOCHISTAN KI PAKHTOON SAQAFAT:-

Yahan k log bht mehnati aur jafakash hotay hain . Yahan boli janay wali zabaan pashto hai , inka lehja kpk mein boli janay wali pushto se mukhtalif hota hai . Inki aksariat ka pesha tijarat aur transport hai .

PHOTO COURTESY : GOOGLE IMAGES

                             ZARA KHALID 

                              M.A (previous)

SHADI  SE PEHLE OR BAAD K NA JAAIZ TA'ALUQAAT

                    Na mehram se ta'aluqaat shadi se pehle hon ya baaad men na jaaiz hi kehlatay hain. Is liye Islam men nikah ko itni ahmiyat di gayi hai or yehi asal ta'aluqaat hain jo shohar k bivi se or bivi k shohar se nikah k bad qaaim hotay hain. Is liye Islam jaldi shadi krnay ka hukum deta hai.  Hadees pak men hai k :

                     "Jis ne shadi ki us ne apna aadha deen bacha lia"

                       

Shadi k baad jo mard hazraat bahar apnay ta'aluqaat banatay hain uski bohot si wujuhat ho sakti hain aik waja to ye hai k unka mizaaj hi aisa hai ya phir ghar men unko apni biwi se bharpoor tawaja nahi mil rahi. Is liye wo bahar ki larkiyon men dilchaspi lenay lagtay hain, kuch chori chupay to kuch hat dharmi se khulay aam. Ye sab bohot zamano se har ma'ashray me hota a raha hai. Lekin pehle ye sab dhaka chupa tha lekin mobile phone or internet yani jadeed technology k anay k baad ye sab bohot aam ho gya hai. Jadeed technology ne mobile or internet per na mehram se baat kerna ya taaluqat qaaim krna bohot asaan ker dia hai or logon ko is jaanib raaghib kia hai. 

Saari saari rat kisi anjaan shakhs se mobile ya net  per baten krna , hoteling kerna or ghoomna phirna ab bari ya baais-e-sharam baat nahi samjhi jati. Kuch log sath ghoomnay phirnay ko hi bohot samajhtay hain or kuch log to saari hudood paar ker jatay hain. Niyat men khot zra sa aaye ya ziada, khot to a gaya or bharosa bhi kharaab hua lekin be rahravi ka shikaar logon kio is baat ka  ehsaas nahi hota or wo ye sab krna apna haq samajhtay hain. Mard hazraat ko shikayat hoti hai k unki biwi ghar or bachon ki waja se unko time nahi de pa rahi. Jab k khawateen ko shikayat  hoti hai k un ka shohar office men hi masroof rehta hai or unko time  nahi de pata. Aisi khawateen shohar se dilbardashta ho ker bahar tafreeh dhoondne nikal jati hain ya phir wo aurten jin k shohar beron-e-mulk men job kertay hain wo aurten bhi ghair mardon se na jaaiz ta'aluqaat qaaim ker leti hain.Lekin aisi khawateen ki ta'dad bohot kam hoti hai. Khawateen mard ki be twajahi  or harjana pan ko nazar andaaz ker k khud ko apnay bachon or ghar men masroof ker leti hain kyun k wo is baat per yaqeen rakhti hain k unka shohar jahan bhi gaya hai ghar ya bachon ki khatir un k paas hi lout ker aye ga.

                 " Bs aik yehi baat achi rahi mere harjaai ki"

      Hamari filmon or dramon men bhi na jaaiz ta'aluqaat ko farogh dia ja raha hai jaisay udaari, dil-e-beqaraar or zara yaad ker wghyra. Is buraai ko barhanay men media ahem kirdaar ada ker raha hai. Is k ilawa dramon or filmon k zariye dusri shaadi k riwaaj ko barhaya j raha hai jaisay hum nasheen, dua or dusri biwi wghyra. Baaz mard hazraat Islam men dusri shaadi ki ijaazat ka na jaaiz faida uthatay huay dusri larkiyon men dilchaspi lenay lagtay hain. Islam ne dusri shadi ki ijaazat k sath ye baat bhi lazmi qaraar di hai k dono biviyon k sath masaavi sulook rawa rakha jay.  Lekin mard apnay mehdood wasaail ko nazr andaz ker k or in ahkamaat ko pus-e-pusht daal ker dusri shadi racha letay hain, aisi shaadi mazeed masaail ko janam deti hai is ki behtareen misaal guzishta baras ARY per  paish kia janay  wala drama "rang laga" hai. 

               Ab shadi se pehle k na jaaiz ta'aluqaat per nazar daaltay hain. Media per paish kiye janay walay dramon or filmon ka asar bachon per baron se kahin ziada hota hai. Unka kacha zehan bohot jaldi media k asar ko qubool ker leta hai. Media ki waja se bachay waqt se pehle baray ho gay hain. Media k sath sath bachon ki be rahravi k peechay walden ki ghaflat ka bhi hath hai. Waalden bachon ko school, college or university bhej ker bilkul be fikr ho jatay hain or is baat se anjaan rehtay hain k un k bachay ki wahan kaisi sargarmiyan hain. Jab walden ko un k mashaghill ka ilm hota hai to pani sir per se guzar chuka hota hai. Jaisay guzishta baras metric class k do talba ne khud ko goli maar ker halaak kr dia, wo bhi sirf is waja se k un k walden unki shadi karanay per razamand  na thay. Ye koi filmi ya dramai scene maloom hota hai, yaqeenan ye  bachon k apnay zehen ki paidawaar nahi hai balkay media ki karastani hai. Aaj kal school, college or university men class fellow se na jaaiz ta'aluqaat qaaim kerna or usay piyaar-o-mohabbat ka naam dena bohot aam ho chuka hai. Mustaqbil k wo maymaar jin k liye hamaray aaba-o-ajdaad ne baray baray khuab dekhay wo aaj ishq-o-mohabbat ki bheent charh gay.

                             Bahar haal abhi bhi waqt hai isko control kiya ja sakta hai . Zaroori hai k is silsilay men munaasib iqdamaat kiye jaen or media se islaahi kaam liya jay to umeed hai k hum Pakistan k mustaqbil ko tareek honay se bacha saken gay.

                                             BENISH PERVEZ

                                                 MA (previous)               

                                                                            

HAMARAY MA'ASHRAY PER BHAARTI MEDIA K ASRAAT

                   Na janay kab hon gay kum
                   In ehsaas-e-kamtari men maray logon k gham
Bht garmi hai na janay kab kam hogi, ay behn! shub shub bolo. Ye aik behn ki dusri behn se guftugu thi. Is men lafz SHUB SHUB yaqeenan herat ka ba'ais hai. Magar aise kitne hi alfaaz hain jo hamari rozmarra ki zindagi men istemaal ho rahay hain.
           Bachon ko dekhen to unka haal b is se mukhtalif nhi hai. wo bhi indian media se muta'asir  nazar aatay hain. Pakistan ki saqafat or zaban ko khatam krnay ki saazish ki ja rahi hai. India men kaha jata hai,
        "Pakistan men jo kaam hamari fojen nahi kr sakin wo Media ne kr dikhaya"
        (Apni zameen per chalnay ka saleeqa seekho, sang-e-marmar per chalo gay to phisal jao gay)
Is men hum khuda na khuasta India ko sang-e-marmar ni keh rahay. India to wo daldal hai jis men aik paun rakhnay men to bht maza aata hai magar phir paun keecher men dhansta chala jata hai. Hamaray ma'ashray per jo Bhaarti asraat ka ghalba hai, wo ksi se dhaka chupa ni hai.
        Udhaari se zindagi nahi banti kash ye bat hamaray yahan k logon ko bhi samajh a jay. TV kholo to indian ishtiharaat or dramon ki bharmaar hai. Media ke zariye Hindu apnay dramon men apni saqafat ki tarveej kr rahay hain. Rasm-o-riwaaj k farogh k liye her choti se choti rasam ko dramon men dikhaya jata hai aur hamari khawateen, nojawan or bachay ankhen band kr k unki taqleed ker rahay hain. Indian dramon men khawateen bhari zewrat zeb tan kiye hoti hain, log baray baray banglon men rehtay hain or crores ki baten kertay hain. Agr dekha jay to in k dramen haqeeqat se bohat door hain. India men ghurbat ki sharah khatarnaak had tak ziada hai, lekin apnay dramon men wo khud ko ameer kabeer zaahir krtay hain.
         Humen chahiye k hum bhi apnay dramon men apnay soobon ki saqafat ko farogh den. Hamari saqaften bhi apni jaga bohat ahmiyat ki haamil hain. Saqafat ka izhaar libaas se hota hai or hamari khawateen fashion bhi India ka hi apnaati hain. jo fashion pehle India men ata hai wohi baad men Pakistan men muta'arif kraya jata hai, khuah wo musalman khawateen ko zeb de ya nahi.
         Indian dramon men un k mazhabi tehvaar jaisay holi, diwaali or besaakhi waghyra ko baray josh-o-kharosh se manaya jata hai. Yehi waja hai k Pakistan men musalman bhi holi k tehwar ko mukhtalif nam de ker holi khelte hain khas tor per univrsities men ye aam hai. Hum janay anjanay men hinduana saqafat-o-mazhab per amal kiye ja rahay hain. Indian media apnay qomi tehwaron k moqa per aur baaz films me Pakistan or musalmano se nafrat ka izhaar krtay nazar atay hain. India wo wahid mulk hai jo ab tak Pakistan k wajood se inkaari ha or isko mitanay k der pe hai.
 Us k bawajood hamaray gulukaar-o-adakaar bharat men kam kernay k khuahishmand hain jin men Fawad Khan, Mahira Khan, Adnan Sami or Rahat Fateh Ali Khan is k ilawa aik taveel fahrist hai.Hamaray celebrities k sath India me jo sulook rawa rakh jata hai wo ksi se dhaka chupa ni hai. Hamara talent India men rul rah hai.
             Ab sawal ye paida hota hai k kon hai jo inko rokay ga? In k khilaaf action lega? Jo her channel per atay 3/4 ghanton k dramen band kraye ga? or bachon ko bataye ga k aaj jis se tum itna muta'asir ho, un hi se peecha churanay k liye hum ne trainen bhar bhar ker laashen uthaaen.......!

                                                                     BENISH PERVEZ           

                                                                                                   

PAKISTANI MOVIES:    (By KIRAN HAROON)

Pakistani Movies 60s mein bht famous thin log dekhna pasand kerte thay old movies k songs ab bi new generation ko pasand hain bht se songs ka tou dobara se revival kiya gaya. Pakistan ki film industry use waqat shohrat ki bulandiyon per thi hamare culture ko represent kerti thi  namwar actor/actress ShamimAra ,Shabnem,Nadeem,Zeba,Muhammad Ali,Waheed Murad,Deeba jin ki stories hum apne baron se suntey area hain. Bht achi filmen use dore mein banti thin jo k bachay bare sab dekhte thay.Use waqat sensor bi lagaye jate they Fahashi wali filmon per jo k ab kaam ho chukka hai. 

Pakistan ki filmen ab wohi shohrat ki bulandiyon per ubbor hasil ker rae hain  magar ab difference hai bht use era ki films mein aur aj k era ki filmon mein Hamari filmen achi paish kash hain Hmayun Saeed, Soha Ali Abro,Shezad Sheikh,Shaan,Maira Khan,Mahnoor Baloch jo k ab new films mein dikhayi de rae hain. Magar jis tarah ki filmen ab banna start hoyi hain woh hamare culture ko represent nae kertin ap with family usey dekhne k qayyel nae ho patey hum Indian culture ko kyun adopt ker rae hain hamare awards filmen kch dramay bi ...kafi had tak une ka culture represent ker rae hain theek hai hamari ab achi filmen bann rae hain log pasand bi ker rae hain magar yeh filmen hoododon ka tayyun kerte howe bi banayi ja sakti hain aisi vulgar movies dekhna ab zyada tar logo ki habbit banti ja rae hai bht se log ise k muqhalif bi nae hain.

  Reema ki jo pehle ki filmen thi “Nikah” who achi movie thi “Yeh Dil Ap ka howa” Sana ki....aisi filmen jin se ap ko kch seekhne ko mile ya agar seekhne ko na bi mile tou at least woh vulgar type movies na hon. Pakistan mein achi movies with norms bi banayi ja sakti hain.Jaise k ab Pakistani Dramay banaye ja rae hain jo k ab log kafi appreciate ker rae hain ine dramon ko beerone mumalik wale bi Pakistan ko sara rahen hain pazeerayi mil rae hai bht achi stories per mabni hote hain yeh drama serials behtreen writers hain Pakistan mein….Indian dramay ab log itna pasand nae kerte tou aisi filmen bi banayi ja sakti hain hamare Pakistan mein talent ki koi kami nae hai pehle jaisi filmen banni chahaiye jo k ap bina jhe jak family k sath baith ker dekh saken  revival k toor per jo filmien banayi gayi thi woh phir bi behtar thin Anjuman,Aaina, Devar Bhabi, yeh sab tarang ki  movies thin ine ka jo revival howa bht achi filmen sabit hoyin.

Theek hai hum 21 century se belong rakhte hain jo k Modern society hain apni marzi ki movies bi dekh sakte hain magar hamein apne zabt-e-iqhlaq aur ussol nae bholne chahiye extra modern type of movies like “Karachi Se Lahore” “Jawani Phir Nae Ani” aisi movies jo k bilkul hi ap k culture ko show nae kerti  bilkul outclass modern movies hain yahan tak k promos dekhne k bi qabil nae hotey . ……….Shehryar Munawar ki movie “Ho Mann jahaan “ or “Waar”  “Bin Roye “aisi movies banni chahiyen jo k famous bi hoon aur hamari new generation per bi ise ka impact behtar ho kch scenes ya song aise dal diye jate hain jin ki waja se phir woh movies dekhne k qabil nae rehtin Bharat ne Pakistan ki muzakrat ki peshkash thukra di aur phir aisi movies hi fame hoti hain.Achi culture se related ya norms ko samne rakh ker bi movies famous ho sakti hain phir kyun hum zyada tar movies vulgar hi banate hain jab k yeh vulgar movies Pakistan ko deserve nae kerti item songs hi promos mein jo dekhaye ja rahe hote thay news channel per bi Ayesha omar aur Mehwish Hayat k woh hee ise qadar vulgar they k ap dekhte hi channel change ker den sunne k qabil bi nae hain ap apni youth ko yeh sab kyun dekha rae hain jis ka jawaz hi nae hai.Aisi filmon per sensor lagana chahiye naa k" Maalik "jaisi movies per waisay tou hum sab kehte hain k Indian movies dekhne k qabil nae hotin magar jis tarreqe ki movies Pakistan mein ab ban rae hain ya jo mazeed ane wali hain who dekhne k qabil hain kya ya ho sakti hain???? Hamari filmon ka myyar bas itna hi reh gaya hai Hum behtar kyun nae ho sakte Humayun Saeed,Yasir Nawaz, Nadeem Baig jin ko tou pta hai k kaisi movies banti thin pehle …. Dramon jaisi filmen kyun nae bana sakte ????? jab k yeh sab hamare hath mein hai hum aisa ker sakte hain yeh khud kyun nae sochte k hum ek Islamic State se belong rakhte hain aur sath mein yeh bi sochna chahiye k hamri teenage generation ise se kya hasil kere gi. All movies jo k ab tak modern society  mein bann chuki hain une  ka tou mujhe nae pta ho sakta hai kch behtar bi hon but aisi vulgar movies kyunn banayi jati hain inhen roka kyun nae jata kya waja hai kyun aisi movies bann rae hain ine movies mein tamam namwar actor/actress mojood hain jabhi hm pasand kerte hain ya phir ine k songs famous hain ise waja se kyun akhir kya waja hai ??????

                                                               (By "KIRAN HAROON")

"MEHNDI" By Kiran Haroon

                            

               Mehndi ko heena k naam se bi jana jata hai yeh shadiyon ki, chand raat ki, ek tarreqe se pehnchan hai.Ise k bagair sab kuch pheenka sa lagta hai eid ho ya koi aur deegar tehwar yeh hamare culture ka ek lazmi juzz hai Mehndi lagana Sunnat bi hai.Especially Pakistan mein isey mukhtalif tehwarron ki ronaq samjha jata hai.

Mehndi Designs:

Pehle k dore mein mehndi k designs ki bajaye hathoon aur paoon mein chittayi numa mehndi lagayi jati thi phir alag se designs ki book thi jo k ab bhi moojood hai magar  ab neet naye designs k liye social media hai jis k through designs ki bhar mar hai ab new  mehndi styles ki trend zor pakar rae hain jaise ke naggon wali mehndi mukhtalif colours bi mehndi ke designs per ab add ho rae jis se mazeed larkiyan fascinated ho rae hain 14 august per tou baqaida Pakistan k flag wali mehndi bi larkiyon ne lagwayi.

                    

 Ise ki bheni bheni smell bi bht achi lagti hai aur agar mehndi ka colour dagg ajaye tou sone pey sohaga wali bat ho jati hai. Mehndi ki bht si qismen hain ek tou hathon mein jo rachayi jati hai larkiyan har festival mein wedding,eid,birthday party,aur dosre functions mein hathon mein isey rachati hain especially bride k hathon mein aur pairon mein isey rachaya jata hai jis se dulhan ki khobsurati ko mazeed char chand lag jate hain ise k bht se designs hote hain jaise sodani Arabic yeh hum musalmano ka ek tradition  hai:

“Mehndi lagayi baithi hain kuch ise adda se woh

               Mutthi mein ise k de dey dil nikal  Key”

           “Tooth k dal se hathon pe bikhar jati hai

            Yeh tou mehndi hai mehndi tou rang lati hai"  ise k ilawa bi aur bht se songs hain jo k mehndi k functions mein bajaye jate hain.

Mehndi Functions:

 Dosri woh jo as a function hoti hai jis mein dandiyan khela jata hai,dhol bajaye jate hain bride doli mein ati hai ya phir Charon ore siblings ya cousins use k oper dupatta saye ki tarha rakh ker bride ko latey hain aur larkon ka bhangra bi hota hai aur dance antakhshiri bi ise function ki tayyari ki practice kch roz pehle hi gharon mein start hojati hai hulla gulla,cheer khani,knock jhonk cousins k sath  larkiyon ka mehndi k function tak chalta rehta hai.

 Ise mein larkiyan khas ker bht enjoy kerti hain yeh taqreeb rath dair tak bi jari rehti hai dulhan ammoman ise mein yellow dress zaib taan kerti hai jab k deegar larkiyan shalwar kameez with bangles aur larke bi shalwar kameez aur ise k sath dupatta lete hain aur ise mein deegar rasmeen hoti hain.Ek na bholne wala environment create hojata hai jo k zindagi bhar k liye yaad gar ban jata hai Memon community mein larkiyan mehndi function mein  gol dairah bana kar “Rasra” khelti hain ise k bht se steps hote hain jo k kayi gano per khela jata hai magar “Mehndi ki yeh raat” Aur “Latthe di chadar” yeh gane ammoman maqhsoos hain.

Mehndi Hairs Per:

Teesri who jo ammoman hairs per lagayi jati hai colour k toor per jo k ap ko  natural brown ya marronish colour deti hai jis se ap young nd beautiful lagte hain.Zyada tar khwateen jo hair dye nae kerti who yeh use kerti hain ya woh larkiyan bi jin k hairs early age mein white hona start ho jate hain unhen mehndi natural colour deti hai.

Mehndi key Side Effects:

 Mehndi k bht side effects bi ab samne arae hain especially Kaali mehndi K jis k sabab hath bht mutasir ho rae hain bht si dulhanon k hath aur pair bi ise se mutasir ho chuke hain yehi waja hai k ab bht si zyada chemicals wali mehndiyan band ho chuki hain.Aur ab bht jaanchne k bade mehndi kharidi aur lagwayi jati hai.Bht se parlours jin ka naam hai fame hain woh mehndi ki shikayat ki waja se ine ki shohrat mann per chuki hai.

                

                                                                                            (By Kiran Haroon)

HONOUR KILLING IN PAKISTAN

GHERAT K NAM PER QATAL

                         Ay chand yahan na nikla kr

                        Be naam se sapne dekha kr

                       Yahan ulti ganga behti hai

                       Is des men andhay haakim hain

                        Na dertay hain na nadim hain

Qatal, qatal hai chahay gherat k nam per hi kyun na ho aur Islam men gherat k nam per auraton k qatal ki koi gunjaish nahi hai balkay Islam to aurton k sath behtar sulook ki taleem deta hai aur aurat k surkash-o-na farman honay per bhi Allah mard ko mukhtalif hikmat-e-amli ikjtiyar krnay ki salah dera hai.

            Badqismati se Pakistan men gherat k nam per honay wlay qatal men tezi se izafa ho raha hai. In men honay wlay aksar qatal men to gherat nazar hi ni ati balkay ye ba gunah qatal hotay hain. Quran pak men wazeh farma dia gya hai k:

               Aur jo koi ksi musalman ko qasdan (jan bojh kr) qatal kr dalay to us ki jagah jahanum hai jahan wo hamesha rahay ga. (surah-Nisa ayat:93)

              Dunya men gherat k nam per qatal hotay hain lekin agr Pakistan ki bat ki jay to idher ye aam si bat hai or hukumat in sab k agay bebas hai kyun k idher jo qanoon ban gya wo ban gya or gherat k nam per qatal ka qanoon bhi kuch jaghon per raij hai yani mukhtalif subon men aj bhi mojood hai. Isko mukhtalif nam bhi diye jatay hain jaisay karo kari or siyah kari wghyra.

             Pehle gherat k naam per qatal sirf gaon deehaton men hi hotay thay lekin ab ye burai sheheron tak phel gai hai. Abhi kuch dino pehle hi adaakar-o-gulukar or model Qandeel Baloch or Samia shahid ko gherat k naam per qatal ker dia gya. Qandeel Baloch ko us k bhai ne or Samia Shahid ko us k sabqa shohar ne mout k ghaat utaar dia. kiya hamari jaan itni susti hai k jab chahen baaap, bhai ya shohar hamari saansen cheen len? Yeh silsila na janay kab tak chalta rahay ga? or kitni Qandeelen or Samia apni mukhtalif kahanion k sath breaking news ban jaen gi.  
               Pehle mere ghar k andar mujhe qatal kren
               Aur phir mera sog manaen namaloom afraad
               Sawal yeh hai k gherat k nam per qatal aurton ka hi kyun hota hai jab k is men aik mard bhi shareek hota hai or is trah saza ka mustahiq to wo bhi hua. Ye jaahil log khandan ki izzat qaim rakhnay k liye orat ko hi kyun qurbaan krtay hain? khawateen k sath hi ye imtiazi sulook kyun rawa rakha jata hai? bilashuba ye riwayat sharamnaak hai balkay aik wehshiana amal hai. Wo khawateen jo gherat k nam per apnay hi ghar walon k hathon mout k ghaat utaar di jati hain to kia unko jeenay ka koi haq nahi tha, agar unse koi ghalti ho gai ho to us ki saza kiya sirf mout hai? Ye intihai sharam ki bat hai k hum us nabi k ummati honay k bawajood gherat k nam per qatal ker rahay hain jinho ne beti ko zinda dargor krnay se mana kia or beti ko rehmat qarar dia.

                Aik bhai ne apni behen ko sirf mobile istemaal krnay per maar dia. Ye kon si gherat thi? hamaray akhbaar is trah ki khabron se bharay hotay hain. Aisay logon ka nafsiyati ilaaj hona chahiye is k ilawa inhen Islami taleemat se aagahi di jay takay ye log janwar se insaan ban saken......!

                                                      Mat tehzeeb-o-tamaddun ki tum hum se baat kro
                                                      Dil ka dard chalak jay ga werna aankhon se
                                                      Gherat k is naam pe ab tak jitne khoon huay 
                                                      In men kal aik char baras ki bachi bhi dekhi
                                                      Jis ne hath men kapray ki aik gurya thaami thi
                                                      Mutthi men aik tofee thi jo us ne khaani thi
                                                      Us ki palkon per hairat thi,
                                                      Hairat men tha khouf
                                                      Gardun per khanjar ka ghaao itna gehra tha    
                                                      Jaisay usko kaatnay wala hath paraya ho
                                                      Ghar k gheratmand mardon se puch saki na wo
                                                       Baba, bhaiya , bolo gherat kis ko kehtay hain!!!
                                                       Mat tehzeeb-o-tamaddun ki tum hum se baat kro

                                    BENISH PERVEZ